Am Kader vun menger Formatioun an der Bioénergie un deier ech grad deelhuelen, hunn ech a mengem leschte Module ganz vill iwwert Glawenssätz geléiert a wéi eng blockéierend Wierkung si op eis an eise Kierper hunn. Ech hat mech schonn virun Joren domat auserneen gesaat an déi Formatioun war eng wonnerschéin Verdéiwung an dë
sem Beräich. Zanter deem sinn ech faszinéiert ze observéieren, wéi vill deier Sätz am Alldaag sou opkommen.
Glawenssätz si Sätz déi mir ausdrécken oder eis selwer soen (bewosst sou wéi onbewosst), un déi mir gleewen, rsp. déi eiser perséinlecher Wourecht entspriechen. Des Sätz krute mir oft unerzunn oder agepräägt (vun der Famill, der Schoul, der Gesellschaft, de Medien…) oder mir hunn se am Laf vun de Joren selwer kreéiert.
Heefeg Glawenssätz sinn zB.
ech kann souwisou näischt
ech si net gutt genuch
ech kann op keen zielen
et kann een kengem trauen ausser sech selwer
keen ass frou mat mir
ech wäert ni/ëmmer rem…
kleng Meedecher musse roueg sinn
staark Jongen kräischen net
et muss ee leiden fir schéin ze sinn
mir sin op der Welt fir ze leiden
asw.
Et ass wichteg ze wëssen dass jiddereen d’Realitéit duerch seng eegen Palette vu Filteren gesäit an et ganz normal ass, Glawenssätz ze hunn. Et ass also e Konstrukt vun deem jiddereen vun eis betraff ass, well jiddereen deier Sätz fréier oder spéider zum Filter vun senger Realitéit gemaach huet an och net all Glawenssaz ass onbedéngt negativ oder schiedlech.
Wat ech virun der Formatioun allerdéngs net wousst ass dass Glawenssätz och mat der DNA kenne verierft gi. Sou kenne mir also u Wourechten festhalen well se virun Generatiounen an d’Liewen geruff gi sinn a mir se einfach ouni eppes dovun ze wëssen iwwerholl hunn an dat obwuel se haut absolut kee Sënn méi maachen.
Egal em wéi eng Aart vu Glawenssätz et sech handelt, et ass op alle Fall interessant an och sécherlech net onwichteg, sech domat auserneen ze setzen fir ze kucken wei eng dovunner eis d’Liewen verdammt schwéier maachen.
Et kann een domat ufänken a seng Gedanken sou neutral wéi méiglech ze beobachten. Mat bëssen Gedold fënnt ee ganz séier déier Sätz déi ëmmer rëm zréckkommen. Fir den Ufank kann een sech se all opzeschreiwen an da kann een mat senger Intuitioun nopréiwen op se nach ëmmer fir eis stëmmeg sinn oder net. Wann se een an sengem Liewen blockéieren oder näischt ausser Frust an Trauer bréngen, dann ass et wichteg fir se ze erkennen an opzeléisen. Natierlech kann een sech dobäi hëllefen loossen, wann et ze déif geet. An och déi richteg Kraider kennen een dobäi ennerstëtzen.
Mëttlerweil sinn ech richteg gutt doran gi se ze erkennen, dat heescht natierlech net dass ech immun dergéint sinn, an grad op sou besonnesche sensibelen Deeg kennen déi Glawenssätz mech richteg verletzen... Mee op mannst hunn ech geleiert, se ze erkennen an net méi an en totalen Opfermodus ze falen aus deem ech net méi erauskommen.
Sou war et gëschter rëm souwäit, ech hunn se scho vu wäitem gesinn wéi se op hirem héije Päerd geridden komm sinn. Ech hunn se erkannt an awer hunn se mech verletzt. Ech hunn déi Gefiller probéiert unzehuelen an ze spieren - Gefiller wëllen erkannt ginn an dat schlëmmst wat een kann maachen wär se ze ënnerdrécken. Wou ech doheem a mengem safe space war hunn ech meng Trommel ausgepaakt a getrommelt. Meng Stemm huet net laang op sech waarde gelooss, am Ufank nach lues an ziddereg an dunn ëmmer méi secher… ech hu mir virgestallt meng sämtlech Gefiller géifen sech am Hals versammelen an erausfléissen a war selwer erstaunt wéi haart a gefestegt meng Stemm ginn ass. Dono hunn ech meng Gefiller alchimiséiert, mat enger wonnerbarer Technik déi ech och an deier Formatioun geléiert hunn an nodeems hunn ech mengem Kierper erlaabt alles ze spieren… well bei mir all Emotioun direkt am Kierper spierbar ass, war et mer wichteg mengem Kierper dee Raum ze ginn. No annerhallwer Stonn war ech rëm e Mënsch mat klorem Verstand a konnt dee ganze Prozess aus der Villechersperspektiv gesinn… Ech sin extrem dankbar fir all déi wonnerbar Tools déi ech gesammelt hunn fir besser mat sou enger Situatioun eens ze ginn. An e puer Deeg ginn ech hin a schaffen nach emol drun fir dee Glawenssaz ee fir alle Mol opzeléisen…
Mir ginn grad duerch en Transformatiounsprozess, dat ass scho zanter puer Wochen extrem spierbar am Groussen wéi am Kléngen. Dëse Vollmound huet eng Schëpp dropgeluecht a wann ech sou kucken waat déi nächst Zäit vun Energien am Raum stinn, denken ech dass de ganze Juni nach spannend wärt ginn (ouni méi wäit am Kalenner wellen ze kucken). Dovunner ass och jiddereen betraff, souwuel net spirituell Leit déi näischt mat deem ganze Schirri Mirri kennen ufänken a warscheinlech ganz onbewosst an de Prozess falen, wéi Leit déi scho laang op hirem spirituelle Wee sinn a scho villes geheelt a lassgelooss hunn… Op eemol kenne rëm al Wonnen opgerappt ginn a wéidoen, al Gedankesätz opkommen, al Geschichten un d’Oberfläche kommen. Dëst ass e wichtege Prozess duerch dee jiddereen op seng Aart a Weis mol gutt, mol manner gutt muss navigéieren. Et kann een et als lästeg, ustrengend an ermiddegend gesinn (wann een voll dra stécht, dann ass et dat och!) oder awer als Chance fir rëm Ales lasszeloossen an ze heelen.
heelsam Gréiss,
Cynthia
